Ceumeucop

Bismillahirrahmanirrahim,

MasyaAllah, suuem that ka padum uroe nyoe di Houston... padahai ban mantong ditamong musem suuem nyoe... kiban aleh ntreuk watee ka betoi2 musem suueeeem.... :(

Sinyak Husna han ek ditheun suuem... bak ulee jih ka ditimoh maji mirah2.... gatai that meunyo keunong reuoh... jadi jih meunyo meureuoh, sabe diklik sira ditarek2 ok jih... kadang2 sampoe teulhet ok jih meu 20 on!!!! saboh reugam teulhet....

Nyan keuh dirumoh payah udep aircon sabe2... meunyo han Sinyak Husna ka beurigen laju2... dan jih galak that jijak manoe jinoe... ngat leupie bacut badan jih kadang....

-----

Weekend nyang kalheueh, Abu neubloe meusen ceumeucop keu Mi.... jadi jinoe Mi teungoh gabuek meureunoe ceumeucop.... Alhamdulillah jinoe kalheueh teucop saboh rok keu Mi... InsyaAllah dalam watee toe nyoe Mi keuneuk cop bajee atawa sileuweue keu Sinyak Husna chit :D

Dan uroe Aleuhad nyoe Chuma Yek jiwoe dari teumpat sikula.... Sinyak Husna jeuet meuen2 lom ngon Chumaaaaaaaa.... :D

Jak Meuramien

Bismillahirrahmanirrahim,

Uroe Sabtu kalheueh, kamoe meujak meuramien bak bineh laot di Seawall Blvd, Galveston Island. Nyoe nakeuh kali keuphon Sinyak Husna jijak u laot...

Kamoe meujak dari rumoh kira2 poh 9 beungoh leubeh bacut... Hana jioh lom kamoe meujak (mantong di West Airport) Sinyak Husna ka teungeut jih... Chit awai jibeudoh beungoh nyan...

Alhamdulillah jalan hana jem... watee trok bak kawasan NASA mantong nyang na jem bacut saweueb rame ureueng nyang keuneuk teubiet dari highway dan meunyo hana salah Mi, teungoh dipeugleh jalan chit... Na saboh moto raya nyang dijak peuleuheun2... bak moto nyan na tanda jiyue moto laen nyang na dilikot jih untok cok lane laen... dikeue moto nyan na dua boh moto peunyampoh jalan... moto nyan jih lagee vacuum cleaner ube raya...

Leupah kawasan NASA, ka hana jem le... dan kamoe trok u Galveston Island dalam poh 10.30 beungoh... Tapi rasa2 uroe that su-uem... lagee hana galak mantong Mi kalon pasi nyan, saweueb hana meusibak pih bak kayee na bak teumpat nyan...

Dang meupreh Sinyak Husna jaga, kamoe meujak2 ngon moto bak Island (Pulo) nyan... Hana that meuri le bak teumpat nyan na tom di-ek ie laot lagee Tsunami bak teumpat geutanyoe... Tapi ie raya disinoe kon keurana geumpa, tapi keurana Bade Ike (Hurricane Ike)... Hana lom trok sithon Polu nyoe hanco saweueb ie raya, tapi takalon mandum teumpat kagleh... hana le broh meusiseue lagee di Banda Acheh :P

Lheueh meujak2, kamoe parking moto bak bineh jalan Seawall Boulevard... Seawall nyan meunyo dalam basa geutanyoe artijih nakeuh binteh laot... jiboh nan seawall saweueb jalan nyan chit diateueh ateueng laot.... jeuet keu bataih antara laot ngon darat pulo nyan.... (Meunyo bak teumpat geutanyoe lagee ateueng laot di Uleelhee)

Ban meupiyoh siat, Sinyak Husna ka jaga laju jih... ka jeuet kamoe teubiet dari moto, meujak2 ngon tapak bak bineh pasi...

Phon, Mi pike Sinyak Husna teumakot keu ie geulumbang saweueb han tom dikalon pih ie geulumbang nyan... tapi pane na.... dilakee tron laju jimeuen pasi dan meuen ie laot... chi neukalon pat gamba jih nyaaaaan..... meulabo keudeh ngon pasi!!!!

Trep chit kamoe meuen2 bak bineh pasi nyan..., watee ka deuek, kamoe pajoh bu di dalam moto mantong...., Mi ngon Abu hana galak sagai pajoh bu bak restoran di Amirika nyoe... alasan keuphon, hana makanan haleue.... keudua, chit hana mangaaaat!!!!

Na sigo kamoe meujak u Kemah, Galveston, kamoe tamong bak restoran... Mi bloe steak eungkot.... tabeue keudeh hana rasaaaaaaa..... dak meudeh tabloe mantong eungkot udep, tapeugot steak keudroe teuh.... hhmmmm yummyyyy!!!!!

Lheueh pajoh bu, kamoe teubiet lom dari moto, meujak2 bak bineh pasi.... kalon2 ureueng surfing.... tapi sang geulumbang teungoh hana got... hana geulumbang raya.... jadi awak nyan pih hana that got jimeuen surfing nyan....

Hek bak meulet2 ie dan badan Sinyak Husna ka leupie saweueb bajee jih ka basah, kamoe ka meupakat keuneuk jak woe.... Lheueh Mi tuka bajee Sinyak, kamoe pih woe...., hana lom trep kamoe dijalan, Sinyak Husna ka teungeut loooom.....

..............................

Ayon

Bismillahirrahmanirrahim,

Baroe Abu Husna geulhat ayon keu Sinyak Husna bak bak kayee dilikot rumoh kamoe... Ayon nyan ka geubloe padum uroe nyang kalheueh watee kamoe meujak u Walmart..., tapi baroe ban na watee geupeugot buet lhat ayon nyan...

Watee phon di-ek ayon, Sinyak Husna lagee teumakot chit jih... tapi watee ka beasa, ka galak thaaaaat... ka teusinyom2 jih sira teuduek lagak dalam ayon nyan...

Uroe nyoe lagee nyan chit, beungoh kon ka dijak pakat ek ayon keudeh... han ditem tamong u dalam rumoh..., watee keuneuk Mi cok peutamong u dalam jikheun "Beeeeek, Beeeek... Hana hana hana..." lheueh nyan diklik...

Padahai watee diek ayon nyan, mata jih ka teupet karap teungeut :D

Sayang Sinyak Husna Meutuah nyan!!!!

Dompet Mi

Bismillahirrahmanirrahim,

Dompet Mi nakeuh meuneu'en favorite Nyak Husna..., aleh pakon galak that jih ngon dompet nyan...,

Sebetoi jih dompet nyan nakeuh dompet Michik jih nyang na di Acheh..., watee Mi keuneuk jak keunoe u Amirika watee nyan, dompet nyan geubi le Michik..., sampoe'an jinoe mantong Mi ngui chit dompet nyan...,

Nyak Husna galak that jih bak jisuet2 mandum card nyang na dalam dompet Mi (credit cards, ATM cards, insurance cards, library cards, DL card, dan card2 laen lom)... Teuma meunyo na peng dalam dompet nyan, peng2 pih ka jicok chit...

Bak saboh watee, Mi tingat dalam dompet nyan na sion peng $10 dan sion peng $20..., lheueh jipeusiseue mandum cards, Mi jak cok peusapat keulai saboh2... ka hana meupat peng $10!!!! Mi pike..., ho ka jiba peng nyan le Sinyak??? Peue ka jeuet jijak u Family Dollar sidroejih jak bloe krupuk peue???

Mi mita keunoe keudeh... keuneulheueh buet, Mi keuneuk peusapat meuneu'en Sinyak Husna, Mi keubah dalam tong moto Lightning Nyak Husna... watee Mi peuhah tong nyan... nyan pat na peng $10 Mi.... Carong that Sinyak Husna ka bak dikeubah peng nyeeeeh??? Meutuah Sinyak nyan!!!!

Bek Meunyesai Dudoe

Bismillahirrahmanirrahim,

Uroe Sabtu kalheueh, di Houston na bade geulanteue... Ujeuen raya ka dari malam kon hana piyoh2 sampoe trok watee Leuho uroe Sabtu...

Mi deungo bak beurita, bahgian baroh Houston keunong bade leubeh parah nibak teumpat2 laen... dan na beurita na saboh moto sedan ditamong dalam krueng watee teungoh ujeuen nyan... 5 droe aneukmiet meuninggai han jeuet jiteubiet dari dalam moto nyang ka nom nyan...

Meunurot beurita, dalam moto nyan na 2 droe ureueng muda agam dan 6 droe aneukmiet... ureueng nyang me moto nyan, teurnyata mabok lheueh jijep ie arak... jikarat chit me moto dalam ujeuen geulanteue...

Dang dime moto nyan mantong chit jipeugah haba rot talipon jaroe... nyan keuh nyan... ka mabok, me moto lom dalam ujeuen raya, sira peugah haba rot talipon LOM!!! Na aneuk manyak lom dalam moto nyan!!!! Chit ka jawai!!!

Keuneulheueh buet peue han jigrop moto nyan ditamong dalam krueng?????? Jih dua nyang ka rayeuek jeuet lah jiteubiet dari moto nyan jimeulangoe dalam ie raya jipeusilamat droejih... mantong chit got, meuteumeung jipeusilamat sidroe aneukmiet inong...

Nyang 5 droe treuk??? Kiban haba??? Singoh uroe baro meuteumeung mayet 4 droe dari aneukmiet2 nyan... nyang sidroe treuk meuteumeung mayet lhee uroe lheueh nyan...

Ureueng me moto peue buet meunyesai jinoe??? Peue na udep keulai aneukmiet2 nyan deungon jih meunyesai ??? Alahai apa eeeee... KAJEP LOM IE NURAKA NYAN... NGAT KAH KAH PIH BAGAH KATAMONG NURAKA!!!

Reudok

Bismillahirrahmanirrahim,

Uroe nyoe reudok... ban bunoe Mi kalon bak tivi na haba peu-ingat akan na ujeuen raya ngon geulanteue teuga bak teumpat Chuma Yek geujak sikula... bak beurita nyan jipeuingat mandum ureueng dalam kawasan Chuma Yek dan kawasan geutanyoe chit, supaya beuteugoh akan bala Tornado (angen meupuseng)...

Mi siat2 Mi kalon lom u luwa... chit reudok that... sang2 ka supot, padahai gohlom pih cot uroe... nyang mangat chit tacok ija limbot tajak eh keudeh... lagee Sinyak Husna nyang jinoe teungoh di-eh...

Mi cukop galak Mi kalon beurita teuntang cuaca disinoe... Jeuet tateupeue ntreuk malam peue keuh ujeuen, singoh peue keuh sijuek, seupot nyoe peue na geulanteue... mandum na dipeugah... Lagee uroe jeh na Hurricane... limong uroe sigohlom jiteuka bade nyan, tivi2 ka abeh gabhuek jipeuingat mandum ureueng akan bala nyang akan trok teuka...

Adak hana diteupeue sapeue kadang ka abeh mandum ureueng di Gavelston nyan lagee watee Tsunami trok u Acheh...

Nyan keuh Nanggroe gop... dumpeue jeuet jipeugot saweueb Nanggroe jih Nanggroe Mardehka... nyang keuneuk jeuet keu ureueng malem malem laju... nyang keuneuk jeuet keu ureueng politek meupolitek laju... nyang keuneuk jeuet keu ureueng dagang dagang laju... nyang keuneuk jeuet keu ureueng teknoloji pih meurunoe laju... dumpeue jeuet....

Chi teuk takalon Nanggroe teuh... dumpeue neuk tapeugot sang ka sosah that meuhase... Chi pike pakon jeuet meunan???

................

Nyak Husna Ka Jeuet Jijak

Bismillahirrahmanirrahim,

Alhamdulillah Sinyak Husna jinoe ka jeuet jijak... beuthat pih sigo2 mantong chit reubah... tapi yakin that jih bak jijak2... meunyo teungoh seunang that, keuneuk jak bak abu jih, ka diplueng laju bagah2... kadang pih pat abu jih neuduek pat jijak plueng... hana lom jeuet jipeugot droejih jak ho nyang galak jih...

Beungoh nyoe, lheueh abu jih neuteubiet dari rumoh, kamoe meu'en2 dikeue rumoh dua meuh... Sinyak Husna galak that jimat2 bungong2 puteh nyang na dikeue rumoh... lheueh nyan galak chit jih jisipak2 boh kayee nyang ka rhet... jipeugot boh kayee nyan lagee bola bhan... hehehe aneuk manyak Amirika... aneuk inong galak bola bhan...

Minggu kalheueh passport Sinyak Husna ka trok jikirem u rumoh kamoe... Alhamdulillah jinoe Sinyak Husna ka na passport (gamba jih bak passport nyan kiut kiuuuuuut!!!!! kheun chuma Yah ngon chuma Phong)... InsyaAllah ka jeuet jiwoe u Acheh... tapi hana meutujan pajan jeuet meuwoe... beuthat pih kamoe that meusyen ka keu mandum keuluarga nyang na di Acheh... tapi watee gohlom na....

Ubat peunawa meusyen ate kamoe keu Nanggroe nakeuh aneuk manok dua boh nyang kamoe bloe padum buleuen nyang kalheueh di Sunny Flea Market... watee kamoe bloe aneuk manok nyan mantong ubeuet2... Sinyak Husna galak that keu aneuk manok nyan... hana teumakot pih jih, jimat laju jireugam lam jaroe jih teuga2...

....................

Pinah Rumoh

Bismillahirrahmanirrahim,

Ka trép that Mi hana tuléh sapeuë bak blog Sinyak Husna nyoë. Mi teungoh gabhuëk that bak pinah u rumoh barô. Nyoë mantong han lheuëh lom Mi peukeumah peukakaih rumoh, mantong le nyang teukeubah dalam garage moto.

Umu Sinyak Husna jinoë ka sikureuëng buleuën..., ka jeuët jimeu'euë, ka jeuët jidong2 sira jimat bak méh atawa keurusi..., dan ka jeuët jipeugah haba basa aneuk manyak... dum jipeugah haba sidroë jih... kadang2 jimeulagu chit jiseutot aneuk miët meulagu bak youtube :D

Bak rumoh barô nyoë, Sinyak Husna galak that manoë dalam tub raya..., manoë meu-indram sira dipèh2 ië, sampoë dipo ië nyan abéh basah Mi jih...,

Tapi sayang saré Sinyak Husna jinoë teungoh demam... baroë kamoë meujak u Doktor Salem, geupeugah lé doktor nyan, Sinyak Husna sakét infeksi bak geulinyeuëng... geupeugah ië idông (karap 2 go minggu Sinyak Husna meu-ië idông) jih ka jitamong u dalam geulinyeuëng dan han jeuët diteubiët, jadi infeksi... payah pajoh ubat antibiotic...

Beuklam watèë geujok ubat lé Mi, Sinyak Husna diklik..., ubé raya diklik, lheuëh nyan ka muntah jih dum... sayang Sinyak Mi nyan....

Jinoë jih teungoh ji-éh lom..., meuri that jih leumoih...

Nyak, beubagah puléh sayang, beujeuët tajak u taman lom ngon Abu..., takalon tupè ngon ticém..., iték peulati ngon iték angsa..., beujeuët tajak lét iték nyan lom dua ngon Abu...

Mi Sinyak